onderadu maatu

ಪೆದ್ದುಗುಂಡನ ರಗಳೆ - ೨೮

2010-09-12T20:46:00.000+05:30

ಎನ್ನ ತೋಳ ತೊಟ್ಟಿಲಿನಲಿ ಕಂದ
ಹೂದುಟಿಯಲಿ ಅಡಗಿದ ಕೋಟಿ ನಗು
ನಕ್ಕು ನಲಿದು ದಣಿದು ನಿದ್ರಿಸುತಿರೆ
ಮನ ಮಮತೆಯ ಕಡಲು - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೨೭

2010-01-20T15:27:00.000+05:30

ಬಡಪಾಯಿ ಆಟವು ಎಸಗಿದ ತಪ್ಪೇನು ?

ತಪ್ಪು ಅದ ಜೂಜಾಗಿಸಿದ ಪುಂಡರದು.

ಜಗಳ, ಓಟಗಳೋ, ಕ್ರಿಕೆಟ್ಟಿನಾಟಗಳೋ,

ಗೆಲು-ಸೋಲ್ಗಳ ದ್ವೈತವೇ ದ್ಯೂತ - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೨೬

2010-01-20T15:21:00.000+05:30

ಉಡುವಾಸೆ ತೊಡುವಾಸೆ ಮುಡಿವಾಸೆ

ಮೂಸುವಾಸೆ ಉಣುವಾಸೆ ಕುಡಿವಾಸೆ

ಕೇಳುವಾಸೆ ಕಾಣುವಾಸೆ ಮುದ್ದಿಸುವಾಸೆ

ಆಸೆ ಅತಳ ಭಾಂಡ - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೨೫

2009-05-25T11:48:00.003+05:30

ಗೊಂಬೆ ಹೊಸತಿರಲು ತಾಸೊಂದರ ಆಟ,
ಬಳಿಕ ಅದ ಬಿಸುಟು ಮತ್ತೊಂದರ ಹಠ.
ಒಮ್ಮೆ ತಣಿದ ಆಸೆಯ ವಸ್ತುವಿನ್ನು ಸಾಕು;
ಆಸೆಯಮಲು ಕ್ಷಣಿಕ - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೨೪

2009-03-24T17:43:00.004+05:30

ಎಡವಿದಾ ಕಲ್ಲ ಹಳಿದು ಫಲವೇನು
ಕ್ರಮಿಸುವಾ ಹಾದಿ ಇದೆ ಇನ್ನೂ ದೂರ
ಸಮಯದಲಿ ಸಾವರಿಸಿ ಮುನ್ನುಗ್ಗು ಮರುಳೇ
ಗುರಿಯ ಮೇಲಿರಲಿ ಗಮನ - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೨೩

2009-03-24T17:41:00.003+05:30

ಯಾವ ರಾಗದಿ ಯಾವ ರಸ ಒಸರುವುದೊ
ಆಲಿಸಿ ಮನ ದ್ರವಿಸುವುದು; ಕುಣಿವುದು, ತಣಿವುದು.
ಬುದ್ಧಿಗೆ ನಿಲುಕದ ಭಾವನೆಗಳ ವ್ಯವಹಾರವಿದು
ಭಾವ ಪಟಕ್ಕೆ ಸಂಗೀತ ಸೂತ್ರ - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೨೨

2009-03-24T17:34:00.001+05:30

ಅಕ್ಷರ ತಿಳಿದೊಡೆ ಸರ್ವಜ್ಞನಾಗಲಾದೀತೇ?
ಬೊಗಸೆಯೊಂದು ಶರಧಿ ಬರಿದಾಗಿಸೀತೆ?
ಹೊಟ್ಟ ನುಂಡು ಅಕ್ಕಿಸವಿ ತಿಳಿಯಲಾದೀತೇ?
ಬಿಡು ಜ್ಞಾನ ದರ್ಪ - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೨೧

2009-03-15T11:58:00.000+05:30

ಕದ್ದ ಮಿತ್ರರಿಗಾಗಿ ಬೆಣ್ಣೆ, ಪ್ರೇಮಕ್ಕಾಗಿ ಸೀರೆಗಳ;
ಭಾಮೆಗಾಗಿ ಪಾರಿಜಾತ, ರುಕ್ಮಿಣಿಗಾಗಿ ಅವಳನ್ನೇ ಕದ್ದ.
ಅಬಲರ ಹಿತರಕ್ಷಣೆಗಾಗಿ ಕಳುವಾದರೂ ಮಾಡೆಂಬೆ
ಕದ್ದು ಪರರಿಗಾಗಿ ದೇವ ತಾನಾದ - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೨೦

2009-03-12T14:05:00.000+05:30

ಪುಟ್ಟ ಹರಿವಾಣದಿ ನೀರ ತುಂಬಿಡಲೇಕೆ ?
ಹಸಿ ಮೆಣಸ ಹುಡು ಹುಡುಕಿ ತಂದಿಡಲೇಕೆ ?
ಮಾತ ಪ್ರತಿ ಮಾತ ಕೇಳಲ್ ತವಕಿಸಲೇಕೆ ?
ಗಿಳಿಯು ಪಂಜರದೊಳಿಲ್ಲ - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೧೯

2009-03-08T13:08:00.002+05:30

ಮನದ ವ್ಯಾಪಾರ ಎಂದೂ ತಲೆಕೆಳಗು !
ಬೆಳಕ ಹಾದಿಗಿಂತ ಗವಿಯಂಕುಡೊಂಕೇ ಬೆಡಗು.
ದೊರೆತ ಸುಖಕ್ಕಿಂತ ಇಲ್ಲದರ ಕೊರಗೇ ನೆಚ್ಚಾಗೆ,
ಮನಕೆ ಕಣ್ಣೀರ ಹುಚ್ಚು - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೧೮

2009-01-09T13:41:00.004+05:30

ಪಗಡೆ ರಂಗದಿ ಎಲ್ಲವನು ಸೋತ
ರಣ ರಂಗದಿ ಗೆದ್ದ, ಎಲ್ಲವನು.
ಅಲ್ಲಿ ಮಾನ, ಇಲ್ಲಿ ಜೀವವೇ ಪಣ !
ಎರಡೂ ಜೂಜಿನಾಟ- ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೧೭

2009-01-09T12:59:00.002+05:30

ಸಂಸಾರ ಹಾಸಂಗಿ, ನೀ ಒಂದು ಕಾಯಿ
ವಿಧಿ ಬಿಟ್ಟ ದಾಳದಂತೆ ನಿನ್ನ ನಡೆ
ಹಾವ್ದೋರೆ ಹಿನ್ನಡೆ; ಏರು, ಏಣಿ ಬರಲು
ಜೀವನ ಪರಮಪದದಾಟ - ಪೆದ್ದುಗುಂಡ
-----------------------------------
ಹಾಸಂಗಿ = ಆಟದ ಹಾಸು
ಹಾವ್ದೋರೆ = ಹಾವು + ತೋರೆ = ಹಾವು ಎದುರಾದರೆ
ಪರಮಪದದಾಟ = ಪರಮಪದದ + ಆಟ = ಹಾವು ಏಣಿ ಆಟ

ಪೆದ್ದುಗುಂಡನ ರಗಳೆ - ೧೬

2009-01-07T12:27:00.002+05:30

ಶಬ್ದದ ಹಂದರಕೆ ಭಾವನೆಯೆ ಹೊದಿಕೆ
ಆಲಿಪನ ಕಿವಿಯಲ್ಲಿ ಮತ್ತದು ನಗ್ನ!
ಅದಕಲ್ಲಿ ಹೊಸ ಭಾವ ತೊಡಿಸೆ
ಕೇಳುಗನ ಕಿವಿಯಂತೆ ಅರ್ಥ - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೧೫

2009-01-06T11:39:00.003+05:30

ಹೃದಯ ತಂತಿ ಮೀಟುವ ಗಂಧರ್ವ ಗೀತ
ಕಣಕಣದಿ ಆನಂದ ತುಡಿತ
ಮನದಾಳದ ನೂರು ಭಾವನೆಗಳ ಚಿಲುಮೆ
ಸಂಗೀತ ನಿಜ ಸ್ವರ್ಗ - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೧೪

2008-12-30T11:06:00.003+05:30

ದಿನದ ಆಟೋಟದಿ ಮನ ಜಡವಾಯ್ತು
ಜೀವನಾನಂದ ಬುಗ್ಗೆ ಒಣಗಿ ಬರಿದಾಯ್ತು
ಹಳೆ ನೆನಪ ಹೊಸ ಮೆಲುಕು ಕಣ್ಣೀರ ತರಿಸೆ
ಬರಡು ಮನ ಹಸಿರಾಯ್ತು ! - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೧೩

2008-12-24T12:52:00.001+05:30

ಜ್ಞಾನ ಬೀಜಕೆ ಇಚ್ಛೆಯ ನೀರೆರೆಯೆ
ಚಿತ್ತ ಭಿತ್ತಿಯಲಿ ಅರಿವು ಕುಡಿಯೊಡೆವುದು.
ಬೆಳೆದಂತೆ ಪಸರಿಸಿ ಬಿಳಲುಗಳ ಬಿಟ್ಟ
ಜ್ಞಾನ ವಿಶ್ವವಟ - ಪೆದ್ದುಗುಂಡ
-------------------------------
ಬಿಳಲು = ಬಿಳಲು ಬೇರು
ವಿಶ್ವವಟ = ವಿಶ್ವದಗಲ ಹಬ್ಬಿರುವ ವಟವೃಕ್ಷ

ಪೆದ್ದುಗುಂಡನ ರಗಳೆ - ೧೨

2008-12-14T11:46:00.002+05:30

ಮೂಲಿಕೆ ಸಿಗದೆ ಪವನಸುತಗೆ ಪೇಚು
ಸಂಜೀವಿನಿ ಪರ್ವತವೆ ಸಮಸ್ಯೆಯಾಗೆ
ವಿರಾಟನಾಗಿ ಬೆಳೆದ, ಬೆಟ್ಟವನೆ ಕಿತ್ತೊಯ್ದ
ಸಮಸ್ಯೆಗಿಂತೆತ್ತರನಾಗು - ಪೆದ್ದುಗುಂಡ
--------------------------------------
ಪವನಸುತ = ವಾಯು ಪುತ್ರ (ಹನುಮಂತ)

ಪೆದ್ದುಗುಂಡನ ರಗಳೆ - ೧೧

2008-12-14T11:38:00.002+05:30

ಸಮುದ್ರವೆದುರಾಗೆ ಹನುಮ ನಿಂತನೆ?
ಬೆಟ್ಟ ಹೊರುವಾಗೆ ಅವ ಹಿಂಜರಿದನೆ?
ಎಲ್ಲ ಹಾದಿಗಳಲುಂಟು ಕೋಟಲೆಗಳು;
ಅಡೆತಡೆಗೆ ಮಣಿಯದಿರು - ಪೆದ್ದುಗುಂಡ
----------------------------------
ಸಮುದ್ರವೆದುರಾಗೆ = ಸಮುದ್ರವು ಎದುರಾದಾಗ
ಅವ = ಅವನು

ಪೆದ್ದುಗುಂಡನ ರಗಳೆ - ೧೦

2008-12-13T11:55:00.001+05:30

ಕಾಸಗಲ ಅಕ್ಷಿ ಪಟದಿ ಕೋಟಿ ದೃಶ್ಯಗಳು
ಹಿಡಿಯ ಹೃದಯದಿ ಭಾವನೆಗಳ ಕಡಲು
ಭೌತ ಪರಿಧಿಯೊಳ್ ಭಾವಾನುಭವ ಅನಂತ
ಮಿತದೊಳಪರಿಮಿತ - ಪೆದ್ದುಗುಂಡ
-----------------------------
ಕಾಸಗಲ = ಕಾಸು ನಾಣ್ಯದಷ್ಟು ಅಗಲ
ಅಕ್ಷಿ ಪಟದಿ = ಕಣ್ಣಿನ ಪಟಲದಲ್ಲಿ (ರೆಟಿನಾ)
ಹಿಡಿಯ = ಹಿಡಿಯಷ್ಟು (ಮುಷ್ಟಿಯಷ್ಟು)

ತೋರಣ

2008-12-13T11:51:00.000+05:30

ಹಸಿರು ತಳಿರು ತೋರಣ
ಸಿಹಿ ಹೋಳಿಗೆ ಹೂರಣ
ದಿನವು ಬರಲಿ
ಮಜದ ಹಬ್ಬ
ಶಾಲೆರಜೆಗೆ ಕಾರಣ

ಪುಟ್ಟ ಹೆಜ್ಜೆ

2008-12-10T16:56:00.000+05:30

ಪುಟ್ಟ ಪುಟ್ಟ ಹೆಜ್ಜೆ
ತುಂಟ ಕಾಲ್ಗೆ ಗೆಜ್ಜೆ
ಗಲ್ಲ ಸವರಿ
ಮುತ್ತ ನೀಡೆ
ಮುಖದಿ ಕೆಂಪು ಲಜ್ಜೆ.

ಪೆದ್ದುಗುಂಡನ ರಗಳೆ - ೯

2008-12-04T11:45:00.000+05:30

ನೆನಪ ಸಂದೂಕಿಗೆ ಬಹುಗಂಧ ಚಾವಿ
ಎಲ್ಲಿಂದಲೋ ತೇಲಿ ಬಂದ ವಾಸನೆಯ ಅಮಲು
ವರ್ಷಾಂತರದ ಮರೆವಿನಲೂ ನೋವಿನ ಕದತೆರೆಯೆ
ಮತ್ತೆ ಕಾಡಿತು ನೆನಪು - ಪೆದ್ದುಗುಂಡ
-------------------------------------------------
ಸಂದೂಕು = ಪೆಟ್ಟಿಗೆ
ಬಹುಗಂಧ = ವಿವಿಧ ವಾಸನೆಗಳು
ಚಾವಿ = ಬೀಗದ ಕೈ

ಪೆದ್ದುಗುಂಡನ ರಗಳೆ - ೮

2008-12-04T11:39:00.000+05:30

ಸಂಕಲ್ಪದಿಂ ಜೀವದ ಚಲನ ವಿಕಸಂಗಳು
ಶಯನ, ಪೋಷಣ, ಮಿಥುನ, ಭ್ರಮಣಂಗಳು
ಇಚ್ಛೆ ಪೂರ್ತಿಯಿಂ ತೃಪ್ತಿ, ಅದುವೇ ಮರಣ
ಜೀವಸೆಲೆ ಅತೃಪ್ತ - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೭

2008-12-03T16:10:00.000+05:30

ಅಸ್ಪಂದಿತ ಸ್ನೇಹಾನುರಾಗಗಳು
ಹೃದಿಂದುವಿನ ಕೇತು ರಾಹುಗಳು.
ಎದೆಯಿಂ ವಿಷ ಬೀಜ ಕಿತ್ತೊಗೆಯದಿರೆ,
ಮನಬನವು ಬರಡು - ಪೆದ್ದುಗುಂಡ

------------------------------------

ಅಸ್ಪಂದಿತ = ಪ್ರತಿಕ್ರಿಯೆ ದೊರಕದ
ಹೃದಿಂದು = ಹೃತ್ + ಇಂದು = ಎದೆಯ ಚಂದಿರ

ಪೆದ್ದುಗುಂಡನ ರಗಳೆ - ೬

2008-11-28T14:35:00.000+05:30

ಪಾದಸ್ಪರ್ಶದಿ ಶಿಲೆ ಸಾಧ್ವಿಯಾದಲ್
ನಾಮಬಲದಿ ಶಿಲೆ ಜಲದಿ ತೇಲಲ್
ಅರ್ಧಾಂಗಿಯಿಂ ಅಗ್ನಿ ಪ್ರಮಾಣ ಬಯಸೆ
ಮನಸೇಕೆ ಕಲ್ಲಾಯ್ತು? - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೫

2008-11-09T17:12:00.000+05:30

ಜಗದ ಸತ್ಯ, ಜ್ಞಾನ, ಕಾಡ ಮೂಲೆಯ ಪೂ
ಋಷಿಪುಂಗವರು ಅದ ಹೀರುವ ದುಂಬಿ.
ಸಾಸಿರ ಪೂರಸದೀಪಾಕ ಸನಾತನ;
ಈ ಧಮ್ಮ ಸವಿದುಪ್ಪ - ಪೆದ್ದುಗುಂಡ.

---------------------------------

ಸಾಸಿರ = ಸಾವಿರ = ಲೆಕ್ಖವಿಲ್ಲದಷ್ಟು

ಪೂರಸದೀಪಾಕ = ಪೂ + ರಸದ + ಈ + ಪಾಕ

ಧಮ್ಮ = ಧರ್ಮ (ಸನಾತನ ಧರ್ಮ )

ಸವಿದುಪ್ಪ = ಸಿಹಿ ತುಪ್ಪ = ಜೇನು ತುಪ್ಪ

ಪೆದ್ದುಗುಂಡನ ರಗಳೆ - ೪

2008-11-07T14:04:00.000+05:30

ಹೂಂಕರಿಸಿ ಘೀಳಿಟ್ಟು ತಮಸ ಹೊರಗಟ್ಟು
ಹಣತೆ ಹೊನ್ನ ಬೆಳಗಿಸಿ ಸತ್ತ್ವ ಬರಮಾಡು
ದೀಪದ ಬೆಳಕಲ್ಲಿ ಮಿಂದ ಮನೆಯೊಳಗೆ
ಸಿರಿದೇವಿ ಬರುವಳು - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೩

2008-11-07T13:45:00.000+05:30

ನಭದ ಆಳೆತ್ತರ ಉದ್ದಗಲಗಳುಂಟೆ
ಅರಿವಿನ ಹರವು ಅದಕೆ ದುಪ್ಪಟ್ಟು
ಕಲಿಕೆ ಪಥ ಅಂತ್ಯವಿಲ್ಲದ ಪಯಣ
ಜ್ಞಾನದಾಹ ಚಿರಕಾಲ - ಪೆದ್ದುಗುಂಡ

ಪೆದ್ದುಗುಂಡನ ರಗಳೆ - ೨

2008-11-06T10:59:00.000+05:30

ಒಂದೊಮ್ಮೆ ಎಲ್ಲೆಡೆ ಬೆಳಕ ಕುಡಿಮಿಂಚು
ತಾಮಸದ ಕರಿ ನೆರಳ ಸರಿಯಿತು ಸಂಚು
ಕತ್ತಲೆಯ ಸುಖಭೂತ ನರಳಿ ಬಸವಳಿಯೆ
ದೀಪ ಜ್ಯೋತಿ ಅರಳಿತು - ಪೆದ್ದುಗುಂಡ

ಅಂದೊಮ್ಮೆ

2008-11-05T18:33:00.000+05:30

ಅಂದೊಮ್ಮೆ ನಾನಿನ್ನ ನೋಡಿದಾಗ
ನಿನ್ನ ಬಳಸಿ ಬರಸೆಳೆದಾಗ
ಆ ತನು ಕಂಪ ಸವಿದಾಗ
ನಿನ್ನ ಸಿಹಿ ಅಧರ ಮೆದ್ದಾಗ
ಮನ ಹುಚ್ಚಾಯಿತಾಗ

ಇಂದೊಮ್ಮೆ ನಿನ್ನೆನಹು ಕಾಡಿದಾಗ
ನಿನ್ನ ತುಟಿ ಜೇನ ನೆನೆದಾಗ
ಕನಸಾಗಿ ಮನಸ ಹೊಯ್ದಾಗ
ಬರಿದಾದ ಎದೆ ನೋಯಿತೀಗ
ನೀರಾಗಿ ಕಣ್ಣು ಹರಿಯಿತೀಗ

ಪಗಡೆಯ ಆಟ

2008-06-12T18:16:00.000+05:30

ಪಗಡೆಯ ಆಟ ಬಲು ಚೆನ್ನ

ಓಟದ ಆಟವು ಇದು ಅಣ್ಣ

ನಾಕು ಜನ ಎದುರು ಬದರು

ಮಧ್ಯೆ ಹಾಸನಿಟ್ಟು ಒದರು

ಕಾಯಿ ಕೆಂಪು ಕಪ್ಪು ನಾಕು

ಹಳದಿ ಹಸುರು ನಾಕು ನಾಕು

ಎರಡು ದಾಳ ಕರಗಳಲಿ

ಉಜ್ಜಿ ಬಿಡು ಕೆಳಗುರುಳಲಿ

ದುಗ ಇತ್ತಿಗ ಎಂಟು ಹನ್ನೆರಡು

ನಡೆಸು ಜೊತೆಯ ಕಾಯಿ ಎರಡು

ಕಾದು ಕುಳಿತು ಕಾಯಿ ಹೊಡಿ

ಜೋಡಿಯಿಂದ ಜೋಡಿ ಬಡಿ

ಹೊಡೆದ ಕಾಯ್ ಹೊರಗಟ್ಟಿಸು

ಮರಳಿ ಅದನು ಹುಟ್ಟಿಸು

ಒಂದು ಪೂರಾ ಸುತ್ತು ಹಾಕು

ಹೊಟ್ಟೆ ತಲುಪಿ ಮಲಗು ಸಾಕು

ಎಲ್ಲ ಕಾಯ ಹಣ್ಣು ಮಾಡು

ಇಷ್ಟವಾಗೆ ಮತ್ತೆ ಆಡು

ಬೇಸಿಗೆಯ ಮಜಾ

2008-04-14T21:14:00.000+05:30

ಇದೋ ಬಂತು ಬೇಸಿಗೆ

ರಜವಾಯಿತು ಶಾಲೆಗೆ

ಸಖತ್ ಮಜಾ ನನಗೆ

ಹೊರಟೆ ಅಜ್ಜಿ ಮನೆಗೆ

ಸಿಕ್ಕಿತು ಕವಡೆ, ಅಳಿಗುಳಿ ಆಟಿಗೆ

ಸೀಟಿದೆ ಪತ್ತಾ, ಕರುಗಳ ಬಗೆಬಗೆ

ಖಾಲಿಮನೆ ಪಿಗ್ಗಿಗಳು ಅಜ್ಜಿಗೆ

ನಕ್ಕಿದೆ ಮರಳಿ ಆಕೆಯ ಮಡಿಲಿಗೆ

ಶ್ರೀ ಜಿ.ಎಲ್.ಎನ್. ಸಿಂಹ ಅವರ ಈ ಚಿತ್ರವನ್ನು ನೋಡಿ ಈ ಕವಿತೆಯನ್ನು ಬರೆದೆ.

ಅನಿರ್ವಚನೀಯ

2008-02-12T20:34:00.000+05:30

ಅದೆಂಥದೋ ಪುಳಕ, ಇರುಳ ತಂಗಾಳಿಯಲ್ಲಿ

ಇನ್ನಷ್ಟು ಮಗದಷ್ಟು ಉಸಿರ ಹೀರಿಕೊಳ್ಳುವಾಸೆ

ಹಿಮಕಂಪಿನ ಮದದಿಂದ ಮತ್ತೇರಿದ ದುಂಬಿಯಂತಾಗಿದೆ ಮನಸು

ಕಾಣದಿನಿಯನ ತೊಳ್ತೆಕ್ಕೆಯ ಬಂಧನದಾಸೆ

ಅದೇನೋ ಉಲ್ಲಾಸ, ಒಂದು ರೀತಿಯ ಚಡಪಡಿಕೆ

ನಾನೇ ನನ್ನ ಗಲ್ಲವನ್ನು ಮುದ್ದಿಸುವಾಸೆ

ನನ್ನ ಕೂದಲನ್ನು ನಾನೇ ನೇವರಿಸುವಾಸೆ

ಪೆದ್ದುಗುಂಡನ ರಗಳೆ - ೧

2008-01-28T12:45:00.000+05:30

ಡಿ.ವಿ.ಜಿ. ಅವರ ಎತ್ತರವನ್ನು ಅಳೆಯಲು ಅಸಾಧ್ಯ ಆದರೆ ಅವರ ಮೇರು ಸದೃಶ ನಿಲುವನ್ನು ನೋಡಲೆಂದು ಕತ್ತೆತ್ತಿದಾಗ ನಮ್ಮ ಎತ್ತರವೂ ಕೊಂಚವಾದರೂ ಏರುವುದು ನಿಜವೇ ಸರಿ. ಒಂದು ಹೆಮ್ಮರದ ಕೆಳಗೆ ನಿಂತಾಗ ಅದರ ನೆರಳು ನಮ್ಮ ಮೇಲೆ ಬೀಳುವಂತೆ ಮಂಕುತಿಮ್ಮನ ಕಗ್ಗದಿಂದ ಪ್ರಭಾವಿತನಾದ ನಾನು ನನ್ನ ಮೊದಲ ಚತುಷ್ಪದಿಯನ್ನು ರಚಿಸಿದ್ದು ೧೮-೧೨-೨೦೦೭ ರಲ್ಲಿ, ಅದು ಇಲ್ಲಿದೆ...

ಸುಖ ಸುಪ್ಪತ್ತಿನೊಳಾಡುವರಂ ಕಂಡು

ಕರುಬುವ ಮಂದಿ ಕಷ್ಟಕೋಟಲೆ

ರಹಿತ ಸಗ್ಗ ಘೋರವೆಂದುಲಿವರು

ಪಾಪವದಲ್ಲ ಪುಣ್ಯವೋ - ಪೆದ್ದುಗುಂಡ

ಮೊದಲ ಮಾತು

2008-01-27T15:33:00.000+05:30

ಇದು ಕನ್ನಡದಲ್ಲಿ ನನ್ನ ಮೊದಲ ಬ್ಲಾಗ್. ಹಲವಾರು ದಿನಗಳಿಂದ ಕನ್ನಡದಲ್ಲಿ ಬರೆಯಬೇಕೆಂದು ಬಹಳ ಆಸೆಯಿತ್ತು. ಅದು ಇಂದು ನನಸಾಗಿದೆ. ಇದರಲ್ಲಿ ಕೆಲವು ಪದಚಿತ್ರಣ, ಚುಟುಕಗಳ ಜೊತೆಗೆ ನನ್ನ ಮನದಾಳದ ಮಾತುಗಳನ್ನು ನಿಮ್ಮ ಮುಂದಿಡುತ್ತೇನೆ. ನಿಮ್ಮ ಒಲವು ಮತ್ತು ಸಹಕಾರ ಸದಾ ನನ್ನ ಹಾಗು ನನ್ನೀ ಬ್ಲಾಗ್ ಮೇಲಿರಲಿ.